La Disispirata

 

A te poni cantà senda stimata

cantu ti fusi andà vita crudeli

vistuta se’ di ‘eli la me’ fata

cu l’àgnuli e li santi di lu celi.

 

Di l’àgnuli illu celi la figura

se’ màggjina fideli in tarra amata

chena cunfrontu gali illa nattura

tra middi rosi immezu sciuarata

lu trattu dilicatu e l’almusura

chi pari t’aggja un mastru abà pintata.  

e sciuarata illi meddu teli

comu lu ‘entu ‘n mari cu li ‘eli.

 

Com’e di luci chjara se’ ‘istuta

e stelli luccicanti pa’ curona

polti lu ‘elu di candu paltuta

eri di chici amàbbili matrona

pa’ middi cori Pasca scunnisciuta

e di ‘iltù apprizziati bedd’e bona.   

matrona chi a l’animu disveli

d’esse fatata e dulci come meli.

 

A te poni cantà senda stimata

cantu ti fusi andà vita crudeli

vistuta se’ di ‘eli la me’ fata

cu l’àgnuli e li santi di lu celi.

 

     (1° classificato Padria 2006)               Gianfranco Garrucciu