Rósa di Limbara   

In chissi sarri

undi lu ‘entu cola

tucchendi léi

l’arimuti conchi

e a middi teggji lassa

lu saori di lu mari

chi’ vi sei tu.

Undi la nii carraggja

comu un’antica manta

li profumi più aspri

illa nattura

pa’ adducalli netiti

a lu tempu ch’à di ‘iné

chi’ vi sei tu.

Sutt’a li licci umbrosi

e a li nudosi nibbari

undi lu tassu spagli

li bracciali

e accult’a li canali

illi cuati poggji

ch’ani traini d’ea bundanti

ziduta  a mani pieni

in dilichi cristaddi

chi’ vi sei tu.

Immez’a chissi semiti

luccichi d’avrinu

ch’ani ‘istu  lu trattià

di passi antichi

e lu ‘jannì di cani

in gjigna tempu

undi la silva lassa

l’aiti a l’ammenti

chi vi sei tu

la Rosa di Limbara

lu fiori immacculatu

chi spanti in un abbagliu

l’occhji a ca’ figgjula

e abbri a ca’ t’ammira

la gjanna di lu cori

cu’ lu to’ risu.                                 

Rosa del limbara

In quei boschi di collina/dove il vento si insinua/toccando, lieve,/le solitarie conche/e a mille rocce lascia/il sapore del mare/lì ci sei tu./Dove le neve copre/come un’antica coperta/i profumi più aspri della natura/per conservarli intatti/al tempo a venire/lì ci sei tu./Sotto ai lecci ombrosi,/a i nodosi ginepri,/dove il tasso allarga/i suoi rami/e lungo i canali/nei poggi nascosti/che hanno rivoli abbondanti d’acqua/ceduta a mani piene/in dedicati cristalli/lì ci sei tu./In mezzo a quei sentieri/lucidi di selvatico/che hanno visto il cercare l’orme/ d’antichi passi/e il ghiattire di cani/in ogni tempo,/dove la selva lascia/un varco ai ricordi/lì ci sei tu/la Rosa di Limbara/il fiore immacolato/che stupisci in un abbaglio/gli occhi di chi guarda/e apri a chi ti ammira/la porta del cuore/col tuo sorriso.