No si póni risistì…

  

(La cuntrapposizioni amurósa: arrinecu pa’ Don Baignu)

 

No si póni risistì

chisti dui estremi folti

lu ‘idetti è la me’ molti

lu no videtti è murì.

 

Tutt’e dui violenti

so’ l’estremi chi descriu

molgu si t’aggju prisenti,

si se’ assenti no viu:

di molti è lu disaffiu

pal parà o pa’ fuggì.

 

No si póni risistì…  ecc.

 

Candu no ti ‘icu molgu

d’amurosa simpatia

e candu ti ‘icu tolgu

a punimmi inn’agunia.

Eu si chi pudia

in bon’ora cunniscì.

 

No si póni risistì…  ecc.

 

L’occhji toi a lu me’ cori

so’ penetranti pugnali ;

senza iddu stocu a tuttori

cu una pena multali.

Ca’ di chisti dui mali

aggj’a vulé eleggjì?

 

No si póni risistì…  ecc.

 

Pal finì gjacchì la molti

incontru in videtti o no

voddu murì middi ‘olti

basta videtti però:

chi li to’ bedd’occhji so

più d’amà che di timì.