Tantu tempu éra muta
la mé' poara musa, e oggji è molta:
da lu chjodu è caduta
la mé' cetara, e l'aggju in pezzi accolta;
lu mé’ laru è siccu,
chi illu mé' fronti fési calchi spiccu.
Di li Musi illu monti
no godu più chidd'aria sirena;
paldutu aggju orizzonti,
sacru furóri, fantasia e vena:
d'Arcadia li pastori
più no mi 'óni tra li so' cantóri.
Buschi, rii e funtani
li ninfi sói mi occultan’avari;
li sireni no sani
cun dulciura sciuddí lu cantu in mari;
a li me' bóci e lagni
no folmani più ecu li muntagni.
Li dulci russignóli,
li canàrii, e li suai filumeni,
primma d'iscì lu soli,
alléviu più no dani a li mé' peni,
cu' la grata almunia
di la só’ boci ‘ària, allegra e via.
Lu campu no si 'esti
di gala più, ne d'allégri culóri;
in abiti funesti
mi si mustra la rósa, e l'alti fìóri;
l'alburéddi frunduti
tutti pal me di dólu so vistuti.
Lu putenti 'ilenu
di lu mé' mal distinu addispittatu,
l'abbrìli e màggju amenu
pal sempri a l’occhji mei à malcitatu,
e di la primmaéra
è vinuta pal me l’ùltima séra.
Chiddi campi fiuriti
pal me so sicchi, e no fiórini più;
e chidd'anni fuggjiti
sinni so di la primma ciuintù:
di l'etai matura
appena n'aggju 'istu la figura.
La 'icchjàia è vinuta
candu mi figuràa più piccinnu;
drummitu éra e mi sciùta,
gridendi: Gjà se' 'ecchju, e senza sinnu,
malugratu ài l'anni
in middi pregjudizi, in middi ‘nganni.
Appena chi mi speltu
attindendi a l'avvisu, a lu cunsiddu,
mi cuntemplu, e avveltu
chi no socu un altu, e no socu più chiddu;
isdintatu, ingrispitu,
calvu e biancu lu capu, siccu e fritu.
Simili a l’umbra ‘ana
sparìsi amóri e briu, e cant'aìa:
l'alligria mundana
fugghji la mé' canuta cumpagnia;
e l’amóri mi scaccia,
palch'anda nudu, e timi la ‘jaccia.
Più gustosa no è
la cunversazioni e la 'isítta;
videndi intrà a me
dugnunu fùggji, dugnunu m'evítta.
Ah! cantu e cantu ridi
un sessu e l'altu sempri chi mi 'idi!
Valgugnósu e cunfusu
a la mé' trista stanzia mi ritiru:
di lu tempu l'abusu
piengu senza rimédiu, e suspiru.
und'éra la rasgioni?
Oh chi vita! oh chi vana occupazioni!
Chi sudóri multali
a lu 'entu no aggju incumandatu,
pa’ acchistammi un mali
da me pa’ un gran be’ appriziatu!
Chi peni, e chi fatichi
prémii aspittendi, ch'erani castichi!
Ah! canti splendidesi,
benefizi, rigali, e silvittù,
e faóri e finesi
chi fési a la mattessi ingratittù;
sendi lu gradimentu
candu un dispettu e candu un tradimentu!
Chi rabbi, affanni, assusti!
Chi viggjílii, chi notti mal passati
in caccia di disgusti.
Da me pal piaceri immaggjnati!
Cridendi, (ah chi macchini!)
ch'erani rósi li ch'erani spini!
L'inganni e vanitai
m'ani lu meddu tempu fraudatu,
senza cunniscì mai
un be', chi vildadéru sia statu.
Lu disingannu è gjuntu
oggji, chi socu gjà mezu difuntu.
Li mé' dillitti so'
assai più. Chi focciu eddunca abali?
Disispirammi?... no,
contra drittu divinu, e natturali.
A lu rimédiu aspiru,
chi poss’aéllu sempri chi rispiru.
In lu céli un Patronu
aggju, un Re, un Babbu, un bon amicu,
ch'è prontu a lu paldonu;
sendi offésu, e taldìu a lu casticu:
e abbraccia indulgenti
a ca’ detesta li so' mancamenti.
L'osselvà, chi illu mundu
cuntentu no si dà chi satisfaci,
un dulóri prufundu
di tanti affetti indigni aè mi faci,
e cussì vóddu a Deu
cunsagrà chistu bréi tempu méu.
Li dì, l'óri, l'istanti,
chi viì possu, cun sinzéru amóri
offéru a chist'amanti,
chi da l'omu no vó sinnò lu córi;
e si l'à indivisu
faci pruà in tarra un Paradisu.