Lu ‘idétti mi poni in agunìa…
(unu di li tèmi frecuenti di Don Baignu: la cuntrapposizioni amurósa)
Lu ‘idétti mi poni in agunìa,
lu no vidétti m’arréca a murì.
D’agunìa mi poni la tó’ ‘ista,
a la molti m’arreca la tó’ falta,
tantu chi sia chidda o chi sia chista,
m’ammazza cussì una, come l’alta.
Palchì di li tó’ occhji illa cunchista,
mori ca’ fuggji, comu ca’ l’assalta.
Sempri è abbalta pal murì la ‘ìa
in paratti dananzi, o in fuggjì.
Lu ‘idétti mi poni in agunìa,
lu no vidétti m’arréca a murì.
In mezzu a dui scóddi priculendi
in un mari d’amóri burrascósu
è sempri lu mé’ córi cumbattendi
cun doppiu ‘entu uppostu e furiósu,
candu da unu scóddu anda fuggjendi,
in un altu s’incontra priculósu.
Ansiósu illu poltu dà vulìa
e tu no villu ‘ói pilmittì.
Lu ‘idétti mi poni in agunìa,
lu no vidétti m’arréca a murì.
Lu no’ vidétti è di molti un casticu,
e si ti ‘icu m’è pena di molti:
tantu chi si ti ‘icu, no ti ‘icu
la mé’ molti cun técu sempri polti.
La tó’ cara è pal me unu’nnimmicu
o assenti, o accultu sempri folti
di solti chi no póssu incuntrà vìa
comu pudé la só’ ira fuggjì.
Lu ‘idétti mi poni in agunìa,
lu no vidétti m’arréca a murì.
Lu mezu andu cilchendi, e no l’agattu
pa’ libbarammi da li tó’ rigóri;
vistu lu tó’ amabili ritrattu,
vicu la molti trasfulmata in fióri;
candu fuggjì da l’occhji tói trattu
a molti mi cundanna un cec’amóri;
e lu mé’ córi in chista simpattìa
si dé’ d’un módu, o d’altu cunsumì.
Lu ‘idétti mi poni in agunìa,
lu no vidétti m’arréca a murì.
Chist’amurosa contraddizioni
po’ solamenti in te verificassi:
tu m’ammazzi no v’à distinzioni,
ch’eu sìghia o no sìghia li tó’ passi
tu sempri ill’impussibbili ti poni,
e pal falli pussibili ài trassi.
Dassi no po’ un’alta tirannìa,
chi altettantu si possia estendì.
Lu ‘idétti mi poni in agunìa,
lu no vidétti m’arréca a murì.
Lu basiliscu ammazza a ca’ lu mira,
però no faci stragu a li distanti
fricci di molti la tó’ cara tira,
o assenti, o presenti a dugn’amanti.
Chistu pudéri chi dugnunu ammira
tu sóla l’ài aùtu in mezu a tanti
incanti m’ài fattu gjurarìa
e so li chi mi fai dugna di.
Lu ‘idétti mi poni in agunìa,
lu no vidétti m’arréca a murì.