L'inganni ch'aggju intésu, chi mi fai,
no li 'óddu sapé pa’ no lassatti.
Contra di te mi pióini l'accusi
dicendimi chi sé' un'infidéli,
chi di lu mé' bon córi troppu abbusi,
chi più ti stimu, più mi sé' crudéli;
ed eu tengu l'aricchji, e l'occhji chjusi
pal tuttu chiddu chi mi pò' dà zéli.
Oh cèli, e comu possu cridé mai,
chi tu a me di chissu modu tratti!
L'inganni ch'aggju intésu, chi mi fai, ecc…
Di cantu miss'è dittu contr’a te
gjenti c'à chi s'offéri a dammi prói,
fammi ‘idé, e fammi palpà be'
tutti li tó' capricci vecchji e nói.
Però vulenditi eu tantu be',
chi m’esponghia a chistu, e comu 'ói?
Dapói, si lu dittu è viritai,
chi cori décu aé d'abbandunatti?
L'inganni ch'aggju intésu, chi mi fai, ecc…
Si suzzédi dapói d'avvilguà,
chi cantu ti s'impùta è tuttu 'éru,
la mé' afflizioni e ca’ sarà,
lu mé' affannu, lu mé' disispéru?
Palchissu illa cridenzia è meddu sta,
chi tu mi stimi cun córi sinzéru.
Cussì mi sméru di l'infidaltai
da lu dillittu ‘nfami in libbaratti.
L'inganni ch'aggju intésu, chi mi fai, ecc…
Chi sii, no mi manca lu suspettu,
abbili a ingannammi ancóra tu
però è peggju a un custanti pettu
d’un suspettu l’aé la celtittù,
palchì no pó’ viì mai chiettu
ca’ próa un’amurosa inchiettù.
Viltù è mustrà sirinitai
di gjilusia e di burraschi in fatti.
L'inganni ch'aggju intésu, chi mi fai, ecc…
Lu ch’è sapé di celtu, oh trista solti!
Chi tu sé’ in tradimmi, o chi mi tradi,
è una molti subbra a l’alti spadi
lu no sapenni è meddu centu ‘olti
e l’amóri cussì mi persuadi,
chi aggradi, troppu’a la me’ ‘ulintai
chì in vita no pó’ lassà d’amatti.
L'inganni ch'aggju intésu, chi mi fai, ecc…
A li ‘olti una calunnia, un’impustura
sarà cantu di te si conta e dici,
palchì c’à gjenti invidiósa e dura
chi di l’alti lu be’ troppu l’afflici.
Palchissu tu di te aggji più cura
Chi in ventu ani a parà li tó’ disici.
Da li radici, dugna ‘anitai
tronca, si illu tó’ córi vinn’agatti.
L'inganni ch'aggju intésu, chi mi fai, ecc…
Procura andà cun tutt'attinzioni,
Palchì se' gjudicata tantu e tantu,
chi, in te, di l'alti una imperfezioni
piccatu è contr’a lu Spiritu Santu.
D'aè tu tanta persecuzioni
Sendi in odiu a tutti, non mi spantu.
Ch'è cantu possu cun sinzeritai
di bona fidi e d'affettu mustratti.
L'inganni ch'aggju intésu, chi mi fai, ecc…
Cussì pensu éu, e lu casu pò dassi,
chi sia 'éru cantu ti s'imputa,
chi bona gjenti ti conta li passi
pal sinzirassi di la tó' cundutta:
eu però, póni alzassi o falassi,
no vóddu piddà più chissa dispùtta,
Palchì tutta, a li ‘olti falsitai,
po' esse di ca’ brama ruinatti.
L'inganni ch'aggju intésu, chi mi fai, ecc…