Lu tempu
Palchì no torri, dì, tempu passatu?
Palchì no torri dì, tempu paldutu?
Torra alta 'olta, torra a fatti meu,
tempu impultanti, tempu priziosu,
tempu, chi vali tantu cant'è Deu
pa’ un cori ben fattu e viltuosu.
Troppu a distempu, o tempu caru, arreu
A cunniscitti, oh pesu aguniosu!
Cantu utilosu mi saristi statu,
tempu, aènditi a tempu cunnisciutu!
Palchì no torri, dì, tempu passatu? ecc…
Tempu, ch’in cuntinu muimentu
poni tutta la to' stabbilitai,
chi la to' chietù, lu to' assentu
cunsisti in no istà chietu mai,
ritruzzedi pal me ch'era ditentu,
Candu passesti, da un sonnu grai:
Ah! si turrai, tempu malgastatu,
chi bè, chi t'aarìa ripaltutu!
Palchì no torri, dì, tempu passatu? ecc…
Tempu, chi sempri in gjusta prupulzioni
di lu to’ motu in gjiru andi a la sfera,
n'aggji di me, ti précu, cumpassioni,
ritorrami a prinzipiu di carrera;
di l'anni mei l'ultima stasgioni
cunveltil'alta 'olta in primmaera.
L’esse lu ch’era a me sarà nicatu,
ch'insensibili tanti ani uttinutu?
Palchì no torri, dì, tempu passatu? ecc…
L'alburu tristu senza fiori e frondi,
vinendi maggju, acchista frondi e fiori:
a campu siccu tandu currispondi
un beddu traciu d'allegri culori;
supelvu salta di ‘arru li spondi
riu d'istìu poaru d'umori:
e l’anticu vigori rinuatu
no sarà mai in un omu canutu?
Palchì no torri, dì, tempu passatu? ecc…
La salpi 'ecchja chidd'antichi spoddi
lassa, e si 'esti li so' primmi gali;
da li cìnnari friti, in chi si scioddi,
chidda famosa cedda orientali
rinasci, e tantu spiritu rigoddi,
ch'agili come prima batti l'ali:
e l’animu immultali rifulmatu
no vidarà lu so' colpu abbattutu?
Palchì no torri, dì, tempu passatu? ecc…
La notti è pal vinè, la dì s'imbruna
candu lu soli mori in occidenti;
a luci poi torra tutt'in una
candu rinasci allegru in orienti:
e la suredda, la candida luna,
da li mancanti torra a li criscenti:
e un omu cadenti in chiddu statu
no de' turrà, da undi è diccadutu?
Palchì no torri, dì, tempu passatu? ecc…
Tempu dispriziatu, torra abali,
ch’aggju di ca se’ tu cunniscimentu;
torr'oggji chi cunnoscu cantu 'ali,
chi pruare’ tutt'altu trattamentu.
Ah! d'aetti trattatu tantu mali,
no possu ditti cantu minni pentu!
Cunniscimentu, ah cant’ai taldatu!
A passi troppu lenti se’ 'inutu!
Palchì no torri, dì, tempu passatu? ecc…
No timì, tempu meu, d'impliatti
in bassi e falsi immaggjnazioni,
in fa' teli di ragni, o in chiddi fatti
cuntrari a lu bon sensu, a la rasgioni,
in chimèri, in dillìrii, in disbaratti,
muttìi di la me' paldizioni.
N'aggji cumpassioni, tempu amatu,
d'un cori afflittu, confusu e pintutu.
Palchì no torri, dì, tempu passatu? ecc…
Di dugna stanti toiu appruvittà
voddu, senza passacci ora oziosa:
ne pensu più palditti in cilibrà
li grazii, li primori d'una rosa,
ch'in brei in brei a cunniscì si dà
cantu è vana, caduca, e ispinosa.
Dulurosa mimoria, ch'ispuddatu
m'ai di gusti, e di peni 'istutu!
Palchì no torri, dì, tempu passatu? ecc…
Si cuminciàa di nou a viì,
dia usà diffarenti eccunumia:
nè paltìcula mancu di la dì,
senza implialla be', passacci dia:
chi ben pruìstu, innanzi di murì,
pa l'ultimu 'iaggju mi sarìa.
Oh alligria! oh tre volti biatu,
tempu, candu da te fussi attindutu'
Palchì no torri, dì, tempu passatu?
Palchì no torri dì, tempu paldutu?