CONSIGLI AI MIEI FIGLI

No aggju no ricchesa ereditatu
Cu lu trabaddu cuntinuamenti
A voi aggju assistitu, e ammannatu
E no possu dunavvi altu nienti
Sinò che chistu scrittu ch'èdittatu
Da la mé debili e misara menti.
Tinitilu presenti chistu donu

E dugnunu ni sia bon patronu.

      Dugna fiddolu bonu à tentu a menti

Li cunsiddi d' un babbu, e posti in usu

Cussì voi tinitilu presenti

Cant' eu in chistu scrittu aggju cunclusu

No lu socu scriendi pa’ nienti

E ne credu chi n'éti a fa abbusu

Cant' eu aggiu cunclusu e scrittu chici

Lu donu a voi e so li mé’ disici.

La ch’à boni radici è pianta bona

Ma bisogna chi sia cultivata

 Palchì siddu la pianta s' abbandona

Po’ divintà ben nata e mal' andata

Pal chissu lu patronu o la patrona

No la dei lassa abbandunata

Chi sidd' è che lassata a l’avventura

È dubbiosa fa mala figura.

Ed è chissà la paura ch’aggju eu

No voddu mancu a moltu abbandunavvi

Forsi forsi calchi cunsiddu meu

Pudè in bon carminu incaminavvi

D' esse fideli a la leggji di Deu

Decu primma di tuttu cunsiddavvi

No deti appaltavvi da la leggji

Chi diffetti e mal' opari curreggji

Ca vi protteggji è un Deu assoluttu

Un solu Deu, un solu onnipotenti

Lu chi cumanda celi, tarra e tuttu

Chiddu chi tuttu ‘idi e tuttu senti

Ch'è lu ch’à postu in tarra dugna fruttu

È Irrè assolutu etternamenti

Tinitilu presenti lu chi dicu

Sinno v' aspetta un etternu casticu.

Lu ‘nnimmicu di chista religgioni
Gjastimiggja, e maltratta lu Divinu,
Però voi cun bona intizioni

No deiti piddà chissu caminu
Chi lu ‘nnommu di Deu a pidda e poni
Lu trattani com' è d' un assassinu,
Chissu caminu no eti a piddà   
No lu deiti invanu mintuà.

Deiti frequenti mintuallu

Ma no cu iri e imprecazioni,

Deiti mintuallu ill'adorallu

lllu dì li so santi orazioni                      
llli priculi deiti chiamallu        
E undi la svintura vi s'upponi;            

Chì l'imprecazioni so li chi    

L'omu da Deu facini fuggjì.

C'è la dì distinata pal pricà

Maccari dugna dì sia dì dritta

Andeti in chissà dì a adora

A Deu a la so gesgia biniditta

In chissi dì no si de' trabaddà

La dì si preca e l'alti di s'acchitta

Voi a la gesgia biniditta andeti

Di cori a lu Signori v'avvoccheti.

No isculteti no celti passoni

Chi piddani la gesgia pal dilettu

E chi sustenini la chistioni

Chi dugna preti è pienu di diffettu

Di preti ancora vinnà mali e boni

Comu in dugna classe e in dugna cettu

Voi rispettu a ca v' innusa useti  

Però la gesgia no abbanduneti.

La Casa di Savoja, la chi vanta

La più antica, la più onorata,

Di li nostri Sovrani unica pianta

Pianta fra li gran tituli elevata

Chista casa da lu  1050

Signora di contei era chiamata

Patrunizata da un Primu Umbeltu

Conti bon cristianu onestu e sveltu.

Ma poi alt' e 40 successori

Ani a Umbeltu primu succidutu,

Vittoriu corant' unu e tutti onori

Ani e religioni sustinutu.

La religioni di lu Redentori

Chi illu Monti Calvariu à patutu,

Umbeltu a cunnisciutu chissà leggji

Vittoriu a 900 anni la protteggji.

Alti vinn'aaria mintuatu

Passoni illustri e famosi scrittori 
Omini dotti ch’ani scandaddatu
Lu gjocu di lu mundu a tutti l'ori
In fini ani cunclusu e giudicatu
Ch'è unu solu lu cumandadori    

È un Signori è un etternu Re  

Chi pò daci e piddacci dugna be. 

Credu no podareti dubitavvi
E la leggi divina osselvareti     
E passu  in altu modu a cunsiddavvi  
E cantu arreu siddu m’isculteti
Tra frateddi e sureddi eti a amavvi
E unu a l'altu assistu vi dareti.   
Si v'aggjiuteti reciprocamenti

Viareti pacifichi e cuntenti.

Cussì feti a amichi e a parenti

E a alti passoni neotrali 

Fetili be e tiniti presenti  

Ch'aspetta mali lu chi faci mali 

Cunsuleti l'afflitti, e li dolenti    

Deti calchi cunsiddu a l'infernali

Vali a li ‘olti un cunsiddu ben datu

Pal turrà a caminu un malandatu.

La leggji umana deiti rispittà :

E lu Re e la patria silvì

Di lu governu li leggji osselvà

A lu so bandu deiti obbedì

E siddu lu bisognu vi sarà

Lampavvi pa’ la patria a murì

Ca’ mori pa la patria lassa un fiori

Illa so’ tumba chi mai si mori.

Frequenteti cun cumpagni boni

Siati cu l'onesti in almunia

Chi manda l'omu a la spaldizioni   

Assai olti la mala cumpagnia

La passona ch’à mala intinzioni   
Cu’ idda spaldinni alti volaria

Dicia e dici lu bon dittu anticu

Dimmi l'amichi e ca sé’ tu ti dicu.

Rispitteti lu’ntaressu angenu

Chissu vi polta dannu e disonori

Maccari sia d'oru un saccu pienu    

No vinn' arreca a casa di middori   

Cunsuma come candu un mali lenu

Cunsuma a ca’ di mali lenu mori      

O voi o li minori lu palditi        

Di celtu candu mancu vi criditi.

No v' illuditi, siddu vi ‘iditi

In una florida pusizioni

Talvolta candu mancu vi criditi

La svintura a la solti sill' opponi,

Si rialzeti no insupilviti

Pò vinè una variazioni.

Napulioni supelvu e putenti

È diutu finì misaramenti.

Sidd'è chi viss'accasa la svintura
O vi maltratta la crudeli solti
No vi disamineti, aggjiti cura
Abbraccetila cu animu folti.

La cura vinci la mala ‘intura

Lu tempu variiggja tanti ‘olti   

Solu la molti e irriparabili

Tuttu cantu l'arrestu è variabili.

Lu trabaddanti trattetilu beni

Dugna ‘olta chi trabaddanti aeti

Detili in paca lu chi li cunveni

Illu pacallu no istiracchjeti

Chi peggju di furaà mi pari a meni

Siddu lu trabaddanti no pacheti

Pinseti bè ch’è fendi pinitenzia

Pal pudè procurassi l'assistenzia.

S' eti un amicu tinitilu caru

No lu’nganneti ne lu maltratteti,

Lu bon' amicu è un frateddu raru

Chi voi pai fultuna autu aeti

Silvitilu cun cori abbaltu e chjaru

Si calchi volta faori li feti

Siddu voi l’useti fideltai

Vi currispondi cun sinzeritai.

La limosina feti si pudeti

Aggjitì di l'afflitti pietài

Siddè ch’aeti pocu, pocu deti      

Siddè ch’aetì assai, deti assai

Ma figgjuleti be candu la deti

Detila undi va calamitai

E si assai so li bisugnosi

Cilcheti sempri li più valgugnosi.

No v'abbuseti di là dibbilèsa

D'un misaru chi debbili si senti

No impereti aggjiti sudesa

Maccari chi vi sentiti putenti

Si l'oltraggjeti è una liciresa

È dibbilèsa di la ‘ostra menti,

Lu putenti lu debbili rispettia

E lu libbaru passu li pilmettia.

Siddu fulmeti una sozietai

In più pochi è fulmata, e meddu steti

Indispensabili è la fideltai

Senza la fidi mali v'incuntreti

Lu cumpagnu no lu’nganneti mai

Undi fidi incuntreti fidi useti,

Si capiteti cu lu sfidiatu

Sia prestu da ‘oi abbandunatu.

Lu gjuramentu falzu è un dillittu

È un piccatu greu celtamenti,

Un dilittu ch'è illa leggji scrittu

Un piccatu ch'arresta impressu in menti

Pinseti ch'oltraggjeti un cori afflittu

Sidd’è chi cundanneti  un'innuzenti

E si eti libbaratu un inculpatu

Aeti un delincuenti incuraggjatu.

 La maldicenza è un bruttu diffettu

L'omu vi godi candè maltrattendi

Chissu di l'impustori ha l'aspettu

Ni dici dritti e tolti e sempri offendi

Voi a tutti  useti rispettu

No vi feti ‘nnimmichi maldicendi

La linga maltrattendi no si stracca

Però ossi no ha e ossi fiacca.

Ca gjastimiggja cummetti un piccatu

E manca ancora d'educazioni

Chiss'è un mal'esempiu ch’à datu

E un custumu malu chi imponi,

Palchi l'omu maccari arrabbiatu

Pò isfugà cun parauli boni

Chi inveci di ‘jastimà a Deu

Polcu gjuda pò di comu dich'eu.

Illi trabaddi no feti: la spia  

No feti spia illi suzietai

Lu spioni è malvistu e podaria

Provocà li dissidi e li guai     

Polta e arreca eu li chiamarìa 

Suggjetti a siminà la falzitai

Ma mai spia no si ‘ò chiamatu

Ca salva un bon'oggjettu, o lu so' statu.

Di lu tistaldu vi docu un assuntu

Chi no isculta'a ca be’ l'incumanda

Pa’ lu puntu la fibbia ci manda

E fini di paldì fibbia e puntu

Folma una litti e in tribunali anda

E da la litti n'esci tristu e muntu

S'era gjuntu a cunciliazioni

Meddu era statu cu’ li bon passoni.

Faula chi bisogna so dicendi

No è ne valgogna e ne piccatu

Candu la faula a nisciunu offendi 

Candu a nisciunu no ha maltrattatu

Cu faula l'omu si difendi

E tanti olti si idi ubricatu

Ma si pal faulaggiu è cunnisciutu

Mancu dicendi lu gjustu è cridutu.

L'offesi palduneti e specialrnenti

Si l'offesa no è premeditata

Cunsidereti chi la nostra menti

Calchi volta s'agatta svariata

Siati calmi siati prudenti     

Dugn'offesa no sia ‘indicata

Chi par'isbagliu si po' offindì

E ca no isbaglia è ancora a nàsci.

Illi faccendi ch’aeti di fani   

Si pudeti, lu tempu misureti

E lu ch'è di fa oggji, oggji lu feti

Feti dumani lu di fa dumani,

Ma di fallu però no trascureti

Deiti di lu tempu appruvittani,

Lu chi lassa passa lu bon momentu

Dapoi n'à casticu e pintimentu.

Abali un altu esempiu vi docu

Divisu in quattru rami diffarenti,

A fa cummenti chici no istocu

Chi l'aggju appresu da un sapienti

Libri assai dicia e cibbi pocu

Una femina solu e caccia nienti

Cussi dicia Luigi Luzzatti

Unu di li ministri più esatti.

 Siddu feti una ‘ita mudarata

Sarà più lu gudì che lu patì,

Ma siddu feti una ‘ita sfrinata

Sarà più lu patì che lu gudì

Sia la ‘ostra spesa limitata

A lu tantu chi pudeti spindì

Palchì ancora in casa di lu Re

Dici lu dittu: la regula v’è.

Si Deu mi pilmetti di murì

In casa comu bramu a tutti l'ori

La missa regulari feti dì

Chi sia la me' anima in faori,

Feti a cantu pudeti dispunì

La limosina a li patidori

Chiss'è onori gloria e caritai

E gudimentu pa’ l'eternitai.

A mamma ‘ostra si molgu innanz’eu

La deiti adorà come lu soli

Patimenti, maltratti e ricreu

A un tempu pal voi o fiddoli

E di ‘oi un ingrattu gjudeu

Chiddu chi li proccura discunsoli

Á pal voi o fiddoli tribbulatu

Cu onori però v’à ammannatu.

Di davvi un altu cunsiddu mi piaci

Sibbè tant’alti danni podarìa

Aggjiti illa familia la paci

Cunsilveti la paci e l’almunia

La paci progridì la casa faci

La paci mai distulbata sia

Undi v’è l’almunia si rasgiona

Tuttu si sesta a la bona a la bona.

La passona ch’à paci à sistimatu

Sempri li fatti soi attentamenti…

No aggju no ricchesa ereditatu

Ma trabaddatu continuamenti.